PARHALADO PAGULUT LANGGATAN ?

(Manigati Panghobasion ni Parhalado Partohonan di HKBP)

 Pinatomutomu ni Ompu i Ephorus HKBP

Pdt. Dr. Darwin Lumbantobing

 

I.         Patujolo

Marragam do dalan manang bosir dohot siala ni pamilliton na masa tu sasahalak Parhalado Partohonan di hurianta HKBP. Alai tahaporseai jala taongkuhon do, manang na songon dia pe dalan dohot sialana, Debata do na mamillit jala napabangkithon Parhalado Partohonan marhitehite panjouon ni Tuhanta Jesus Kristus. Naposo ni Debata do na pasahathon tohonan haparhaladoon i tu sasahalak marhite Naposo ni Debata, i ma angka Pandita. Dipasahat do i marhitehite na mangampehon tangan, na dipatupa  di tongatonga ni huriaNa (1 Kor 12:28; Ef 4: 11-12).

Hombar tu na tarsurat di Padan Naimbaru, marragam do nang dalan parbangkit ni sasahalak asa gabe Parhalado Partohonan. Adong do i songon na masa tu angka sisean ni Tuhanta Jesus Kristus. Tuhanta Jesus sandiri do ma millit jala manjou nasida asa gabe siseanna manang naposoNa. Adong do muse songon na masa tu apostel Paulus. Dipillit jala dijou Tuhanta Jesus ibana dung jolo masa panjouon na manghorhon hamubaon ni roha. Laos adong muse songon na masa tu angka diaken, na dipillit ni angka apostel ni Tuhan Jesus Kristus, dung i dipasahat ma tohonan haparhaladoon i tu nasida marhite na “mangampehon tangan” ni angka apostel i laho patuduhon naung mabaor Tondi Porbadia na mian di angka apostel tu angka na manjalo tohonan i. Dung i gabe gok Tondi Porbadia ma nasida sudena  (Ulaon 6: 1-7).

Nang di tingkinta sisaonari on pe, ragam do dalan gabe parhalado partohonan, isarana songon na masa  di hurianta HKBP. Adong do songona na ginoaran panjouon na sahat tu sadasada halak so pola mamparhitean. Lapatanna dijalo panjouon i langsung sian Tuhan i marhitehite hasosonggop ni Tondi Porbadia tu sadasada halak. Di goari ma ma pangalaho sisongon  i “vocatio immediata” – panjouon so pola marhite ‘perantara’. Alai adong na manjalo panjouon i marhite sadasada halak, manang marhite manang marhite pangalaho na masa na gabe dirajumi songon panjouon ni Debata, isarana marhite panjouon, sosososo manang panogihonon ni sadasada halak, manang keluarga, tondong manang sisolhot.

Pabangkithon ni Parhalado Partohonan pe marragam do. Adong do i ingkon marhite na mameop bisolot na jinalona sian parsingkolaan manang parsamean ni hurianta, ala naung sidung mamolus parsiajaran di Hata ni Debata. I ma dalanna patuduhon hatauonna di poda dohot hata ni Debata. Jala angka na mameop bisolot i ingkon sian parsingkolaan manang parsamean ni hurianta do. Alai na boi do bisolot i sian parsamean nampuna ni huria na asing, alai ingkon jolo adong do pangongkuon manang rekomendasi, manang penyesuaian sian parsamaean ni hurianta STT HKBP. I ma ruhut sigohan ni angka na naeng parhalado partohonan di HKBP (AP 2002, hal 60-66).

Dung adong i, jolo di ditangkasi dope do hatauonnasida. Angka na naung tau manang monang eksamen, ima  na ginoaran gabe “calon”, “kandidat”, “vicar” manang praktek parhalado partohonan. Molo tu na laho gabe Sintua digoari ma i leerling (learning)Siantua – lapatanna: Sintua Parsiajar. Alai pulik tu calon Sintua, ndang pola diigil adong hatauon nasida di hata ni Debata marhite na patuduhon bisolot. Sae ma marhite na mandohoti leerling Sintua, huhut marnida pangalaho dohot pangulaonna ni na naeng Sintua di parngoluon siganup ari, di huria manang di huta. Sian i ma idaon jala botoon ni Panditana taringot tu hatauonna, manang naung tau jala talup do ibana gabe Sintua manang na ndang dope.

II.           Ragam ni Parhalado Partohonan

Dung lam maherbang huria i, lam tu ragam na do angka sihobasan di huria i. Hombar tu ragam ni panghobasion i ma partubu ni ragam ni partohonan di huria. Songon i do sian mulana. Di tingki ni apostel i pe nunga tarida parherbang ni huria na patubu partamba ni sihobasan, jala gabe ringkot ma marragam nang angka parhobas di huria i (patudos Ulaon 6:1-4). Suang songon i do parragam ni angka parhobas na gabe parhalado partohonan di tongatonga ni hurianta.

Di hurianta HKBP, hombar tu AP 2002, ndang adong parhalado partohonan na diajari asa gabe maniop jabatan struktural, alai asa mangula panghobasion na fungsional do hombar tu tohonanna. Alai na boi do sahalak parhalado partohonan i maniop uluan ni huria manang jabatan struktural na asing, alai ndada apala i ianggo sintuhu ni tohonanna. Hira tambatamba do jabatan struktural tu ganup partohonan.

  Adong do onom parhalado partohonan di HKBP, i ma Pandita, Guru Huria, Bibelvrouw, Diakones, Evangelist dohot Sintua. Sude parhalado partohonan i ingkon jolo mamolus tingki praktek manang learning, na ummotikna dua taon. Holan tu calon Evangelist do tolu bulan. Dung dirajumi naung tau nasida, diampehon huria ma tohonan tu nasida marhite partohonan Pandita. Asa holan partohonan Pandita do na boi pasahathon tohonan tu partohonan Pandita dohot tu partohonanan na asing. Nian ndang sude dope na diaturhon di AP 2002 I (dung Amandemen na Parjolo) mardalan denggan.

Hombar tu haboion di tingki, dua horong ma parhalado partohonan. I ma parhalado na gok tingki na manjalo balanjo sian huria, isarana Pandita, Guru Huria, Bibelvrouw dohot Diakones dohot parhalado na so gok tingki, na so manjalo balanjo sian huria, i ma Evanglist dohot Sintua. Alai songon parhalado partohonan nasida, rap dongan parhobas jala naposo ni Debata do nasida.

III.        Parsagi ni Panghobasion

Ganup parhalado partohonan adong be do ulaon hapunjunganna, kekhususan-na – di panghobasionna. Ai hombar tu sada panghobasion do dilehon huria tohonan i. Alani sude na onom parhalado partohonan i hira na marsagi do mangula ulaon laho patulushon harajaon ni Debata. Aut sura so songon i, tontu ndang pola ringkot marragam tohonan i. Asing do ulaon ni Pandita sian Guru Huria. Asing do ulaon ni Guru Huria sian Bibelvrouw. Asing do ulaon ni Bibelvrouw sian Diakones, jala asing ulaon Diakones sian Evanglist. Asing do ulaon ni Evangelist sian ulaon ni Sintua. Songon i ma satorusna. Asa adong be do parasingan dohot parsagi ni panghobasionna.

 

Parsagi ni angka panghobasion i hombar do i tu ragam ni sihobasan. Jala ala marragam sihobasan, marasingasing ma nang inganan laho manghobasi. Adong do  panghobasion mamboan barita na uli tu halak na so mananda Jesus Kristus dope, asa porsea tu Jesus jala asa sapunguan di huria i. Adong do nang panghobasion marbarita nauli tu ruas ni huria i, laho pahothon jala pauliulihon angka na porsea tu Jesus Kristus (Ef 4:11). Alani i adong panghobasion na dipatupa di huria, di parmingguon manang di gereja; alai adong panghobasion i ingkon patupaon di tongatonga ni masyarakat, di jabu, kantor, sikola, pabrik, rumah saki, panti asuhan dohot na asing. Asa hombar tu rumang ni sihobasan i do inganan ni panghobasion i. Di toru on boi taida ragam ni tohonan, ulaonna dohot inganan panghobasionna, hombar tu Agenda dohot AP HKBP 2002.

 

IV.         RAGAM NI TOHONAN DOHOT INGANAN MANGULAHONSA

 

 

TOHONAN ULAON INGANAN MANGULAHONSA
PANDITA MarjamitaMarmahani ruas

Ulaon Sakramen

Mangarjahon hata ni Debata

Mamodai/ mangaramoti ruas

Pasahathon Barita na Uli

Manghobasi ulaon sakramen

Marbarita nauli tu na so Kristen

Parmingguon Gereja/ PartangianganKeluarga/ Huta

HuriaJabu

Gereja / Parguruan

Keluarga/ Huta

Gereja/ Keluarga

Gereja/ Keluarga

Masyarakat/ Keluarga

GURU HURIA MarjamitaMarmahani ruas

Mangajarhon hata ni Debata

Marbarita na uli tu na so Kristen

Parmingguon Gereja/ Partangiangan Huria/ Huta: marsasahalak/punguanGereja/ Parguruan

Keluarga/Huta

BIBELVROUW MarjamitaMamatamatai ruas

Mangapuli

Mangajari Ina/ Namarbaju/ Dakdanak

Mangapoi Sipelebegu/ na so Kristen

Parmingguon Gereja/ PartangianganKeluarga/ Huta

Keluarga

Gereja/ Parguruan

Huta/Keluarga

DIAKONES Ulaon parasi ni rohaon tu : namarsahit,               na dangol, na tadingmaetek,  na pogos, na hasusaan, na mabalu, na  matua, na suda gogoMangapuli na marsak

Manogunogu manjagahon hahipason

Hobas mangalehon pangarupion

Keluarga/ Panti Asuhan/ Rumah Sakit 

 

 

Keluarga

Keluarga

EVANGELIS Pararat barita nauli: Kolektif/personalEvangelisasi Masyarakat/ kantor/ sikola/ pabrikGereja/ masyarakat
SINTUA Mamatamatai ruasMandasdas marminggu

Manikkir/ manangiangkon na marsahit

Mangapuli

Manogunogu sipelebegu/ naso Kristen

Mangaradoti guguan

Mangaradoti angka ulaon ni Huria

Keluarga/ HutaKeluarga/ Huta

Keluarga/ Rumah Sakit

Keluarga

Keluarga/Huta

Keluarga

Gereja

 V.      Parhalado Pagulut Langgatan?

Molo taida sian na di ginjang i, taboto ma na so holan di gareja manang di parmingguon hape inganan panghobasian i. Adong do ulaon ni Pandita di parmingguon, adong di tongatonga ni keluarga dohot di huta. Guru Huria pe songon i do. Alai ala tohonan haguruon i, tumangkas ma ulaon pangajarion ampe tu nasida. Bibelvrouw pe adong do inganan panghobasionna di parmingguon, adong di tongatonga ni keluarga nang di huta. Alai ala songon parjamita ina nasida, tumangkas ma nasida manghobasi angka ina, namarbaju dohot dakdanak, na dipatupa di jabu manang di parguruan. Partohonan Diakones gumodang do marhobas di ari holang, jala ndang apala di parminggguon. Ala ulaon parasinirohaon do ulaon nasida, na mangula do nasida manang na sadihari jala manang na didia pe. Isarana di jabu, di rumah saki, panti asuhan, manang inganan ni halak na mangkaringkothon pangurupion.

 

Partohonan Evangelis pe godangan do mangula di duru ni parminggu on. Ala pararathon barita nauli manang na patupa evangelisasi ndada pola sai di gareja i, jala ndada pola sai ingkon sai ari minggu i patupaon. Tumangkas do pangulaon nasida di tongatonga ni masyarakat, di kantor, kampus dohot daerah zending. Angka dia ma ruas ni huria manang na so ruas ni huria dope, angka na so tardungdung di angka panghobasion na somal di huria, tusi do angka partohonan Evanghelis mangula hombar tu tohonanna. Asa pangurupion na tangkas do hajonjongan ni partohonan Evangelis di huria i laho pararathon Barita Nauli.

 

Partohonan Sintua pe godangan do marhobas di huta, keluarga manang masyarakat. Ai ulaon mamatamatai, mandasdas, mangapuli dohot maningkir na marsahit, di jabu do i, di huta dohot di rumah sakit. Alai di tingki  parmingguon, tu nasida do ampe ulaon mangaradoti harentaon dohot angka na ringkot di parmingguon i, isarana maragenda, tingting dohot na asing. Asa molo tapahibul ulaon ni sude parhalado partohonan i, gumodang do i di duru ni ari minggu, manang di ari holang, di huta, keluarga dohot di masyarakat.

 

Hape molo binereng panghobasion ni angka parhalado nuaeng on, godangan nama holan di gareja, holan di parmingguon i sambing. Adong muse do na manghilalahon hira naung hira singkop diula tohonanna ala naung martingki ibana di ari minggu i, isarana manjaha ende (na jolo), maragenda manang marjamita di parmingguon ari Minggu. Lapatanna, holan di langgatan i nama parhalado partohonan i marhobas. Molo songon i do pangalaho na masa, gabe semo ma idaon parasingan ni Bibelvrouw tu Diakones, ala rap manguluhon koor ina nasida rupani. Songon i nang Sintua tu Guru Huria, ala hira sarupa nama pangulaonna dohot panghobasionna. Adong muse ma sian partohonan i na girgir holan marjamita di parmingguon, di gereja. Hira na adong pangantusion na tumimbo do ulaon marjamita sian panghobasion na asing. Sipata gabe hira na marsigulut tu langgata parjamitaon. Hape adong be ulaon hapunjungan ni ganup parhalkado partohonan laho mangulahon tohonanna songon na dipasahat di tingki mangampehon tohonan i. Asa ndang apala marjamita minggu sintuhu ni tohonan na sahat tu ganup partohonan. Na marsagi be do i hombar tu panjouon ni tohonan i.

Di hruianta HKBP, holan Partohonan Pandita do na boi ma masumasu huhut na mangampehon tangan. Partohonan na asing, boi ma pasahat hata pasupasu i so pola mangampehon tanganna. Sialana, ala holan tu partohonan Pandita do dipasahat tohonan na gabe: Partonaan ni Kristus, Singkat ni Kristus dohot Na manghamham Ulaon ni Kristus na tolu i ima: Malim, Panurirang dohot Raja. Asa molo marjamita di partangiangan  manang diparmingguon na so partohonan Pandita, sae ma holan pasahat hata pasupasu. Mansai ondol do didok di Aturan ni Hurianta, na mandok na holan Pandita do na boi pasahathon pasupasu marhite na mangampehon tangan.

 

Marnida pangalaho ima umbahen na nidok di ginjang, parhalado pagulut langgatan? Nian sungkunsungkun dope i. Ndang na apala songon i dope na sasintongna. Alai tutu, holan tu panghobasion di langgatan nama terfokus panghobasion ni parhalado i. Hape lan dope panghobasion na asing nian. Jala ala ni i do dipabangkit jala diampehon huria tohonan na marragam i.

  1. Panimpuli

Saleleng tarpusat tu langgatan panghobasionta, maol do mangerbang hurianta. Baliksa gabe mura sitik akan partohonan parhalado i, ala hira  na tumpu jala hira na pagulut langgatan idaon. Sipareahanta do marhobas di huria i hombar tu tohonan naung tajalo be. Diula ma tohonan na sahat tu ibana be. Asa marhite i lam marbungaran jala lam maherbang  hurianta dohot harajaon ni Debata. Naeng ma taulahon i songon na nidok ni apostel Petrus: “Parmahani hamu ma punguan ni Debata na di hamu, unang songon na pinaksa, sian las ni roha ma mangihuthon Debata; unang alani pangomoan hailaon, sian ringkot ni roha ma!” (1 Pet 5:2). Holan marhite i do boi tapatulus hata ni Debata, songon na pinasahat ni apostel Paulus tu naposo ni Debata: Sahat ula tohonanmu! (2 Tim 4: 5a).